top of page
saint-pierre-de-trivisy_165079

saint-pierre-de-trivisy_165079

Parròquia de Nostra Dama de l'Assompcion

Jos l’egida del curat de la parròquia, lo sénher rector Jean-Claude FERRET, a l’iniciativa del sénher Philippe FOLLIOT, senator e conselhièr municipal, lo sénher Pascal CAVAILLÉS estant conse màger, decidiguèt en 2022-2023 de realizar la restauracion del dintre de la glèisa.

 

Aquel projècte soguèt portat a bona fin mercés als dons de l’associacion de prefiguracion de la fondacion « PETIT-HARICOT » presidit per la dòna LIU Jing (50%) amb la participacion financièra de l’Estat (DETR-35%), de la parròquia (10%) e de la municipalitat (5%). Fin-finala, l’operacion tota de renovacion (faciada, cloquièr, trenhon, frescas, pinturas, lum…) monta a 870.000 euròs.

paroisse.jpg

La Glèisa

Lo cloquièr (campanal), la faciada, la lausada soguèron renovats en 2019. A aquela ocasion, una polida fresca de l’estil bizantin, representant Sant Pèire, soguèt realizada dins lo bojal situat al dessús del revelin, per l’artista Mickaël GRESCHNY.                                                                      De novembre 2022 a junh 2023  lo dintre de la glèisa soguèt completament restaurat (pinturas, veirinas, lum, sonorizacion) per tornar trobar son esplendor originala e encara mai (bandièra, sistèma d’orguena). Los embassaments ancians de fusta soguèron remplaçats per de novèls aligant estetica e qualitats acosticas..

Lo Trenhon

Demest las tres campanas, n’i a pas qu’una qu’es d’origina : la datada de 1762. Es estada inscrita al títol dels monuments istorics lo 12 de genièr 2016.

La segonda de 1809 soguèt acordada tornarmai e la tresena,  aprèp refonda, pòrta ara lo nom de Sant Carles.                                                                           Per convencion, doás campanas sortidas d’unas glèisas desafectadas de la vila de Graulhet, son aicí en despaus.  Sièis campanas novèlas son estadas fondudas pels establissaments COR NILLE-HAVARD en Normandia : tres mercés a de dons privats (Santa Teresa de Lisieux, Santa Joana d’Arc, Santa Ana) e tres mercés a l’associacion PETIT-HARICOT (Sant Pèire, Santa Emilia de VilaNòva, Santa Ceselha).

Amb aquel trenhon compausat d’una octava, se pòt sonar un repertòri de mai d’un centenat de melodias. Es lo quatren del departament e soguèt installat en collaboracion  amb sénher Jean-Pierre CARME, president de l’associacion « Carillons en Pays d’Oc ».

 

Un concèrt vos es prepausat cada dimenge e jorns de fèstas a miègjorn..

Las Pinturas de la glèisa

plan caracteristicas de la fin del sègle XIX-debuta del sègle XX, an quicòm d’excepcional : es d’èsser demoradas preservadas dempuèi que Paul-Noël LASSERAN las pintrèt en 1931. Las òbras d’aquel artista, nombrosas dins lo departament del Gers, son per la màger part inscritas o classadas al títol de la salvagarda dels monuments istorics. La fresca remirabla centrala representa, dins una ondradura originala del sègle XIX, la Cèna, darrièr repais del Crist. Es pintrada, tant coma las doás autras del còr de la glèisa, d’aprèp gravaduras de Julius VET HANS SCHNORR VON CAROLSFELD (Leipzig 1794- Munich 1872), pintre e escrincelaire alemand representatiu del moviment nazarean. La restauracion ne soguèt facha en 2023 per l’entrepresa ATELIER 32, acceptada pels Monuments Istorics.

La Verge Maria amb l'enfant

es una escalpradura excepcionala, de pèira, del sègle XIV (1375-1400). Soguèt inscrita al títol dels monuments istorics lo 22 de novembre 2012 e es a la mòstra dempuèi 2017 dins la capèla Santa Maria.

La Bandièra " Còr sacrat de Jèsus, espèr e salut de França"

inscrita lo 12 de genièr 2016 al títol dels monuments istorics es, el, a la mòstra dins la capèla Sant Josèp. Es un testimòni plan conservat d’aquela epòca desvariada de la debuta del sègle XX, presa dins l’estòc de racinas cristianas assumidas e d’una laïcitat reivindicada.

Veirinas

son plan remirablas de per la qualitat, la belesa e los dessenhs. Fabricadas en 1901 pel talhièr tolosan SAINT-BLANCAT, de bona fama. Soguèron completament renovats en 2023 pel talhièr castrés EN VERRE ET CONTRE TOUT.

Podretz tanben descobrir… dins la nau, un polit CAMIN de CROTZ (1867) plan conservat dins lo còr, un CANTUSSIÈR e un CADIERÀS BISBAL (1874) de fust plan obrat e tanben un autar bèl de marme blanc amb representacion de l’Anhèl de Dieu. Un mecanisme de relotge subrebèl (1925) eissut del cloquièr e d’ara enlà expausat prèp de las Santas Fonts.

Lo còr e las capèlas pòdon tanben aculhir mòstras de cortinatges d’art sacrat.

SIÈTZ dins un LUÒC de CULTE, de pregària e de meditacion > Devètz aver una tenguda corrècta e vos mercejam de respectar lo silenci e la patz del luòc.  Aquela glèisa es uèi venguda per la parròquia nòstra, un escrinh d’art religiós. Aculhís de còps unas manifestacions culturalas e concèrts de musica classica..


« Per transmetre lo messatge que Crist li a fisat, la Glèisa a besonh de l’art. Deu rendre perceptible e mai, tant coma se pòt, pivelant, lo mond de l’èime, de l’invisible, de Dieu. Doncas, deu exprimir amb formulas significativas, çò qu’es en se inefable. Pr’aquò  l’art a una capacitat que li parten, de sasir l’un o l’autre dels aspèctes del messatge e de lo vira-passar en colors, en formas o en sons, qu’afortisson la sentida de lo qu’agacha o qu’escota ».

Sa Santetat Jean-Paul II
Crida als artistas : l’art fa besonh a la Glèisa.

bottom of page